إيّاك عالماضي تتحسّر بتضلّ أسيرو بيئذيك متل القزاز المكسّر إسمو ماضي يعني بيمضي استخدمو عبرة بس ما تخلّيه جوّاتك مأثّر دير ضهرك وأرضى بنصيبك وقول الحمدلله على كلّ شي قدّامك ميسّر
******
ما في إنسان ما عندو ماضي بس الغلط تعيش أسير ذكرياتك وبتكون جوّاتو متل العصفور بقفص بدل ما يكون بالعكس هوّي جوّاتك تمرق الإيّام وتروّح عالفاضي حياتك ما تعرف حاضرك من مستقبلك ولمّا يمرق العمر ما تقدر تعوّض اللي فاتك كلّ زمن وأعطيه حجمو كرمال ما تتخربط ميزانيتك وتلاقي حالك بالآخر فاشل بحساباتك
*******
اللي ما عندو تاريخ ما عندو حاضر ولا عندو مستقبل ، بس التاريخ يعني عِبَر يعني دروس يعني حِكَم بتسوى كنوز ودِرر بس ما بيعني غلط يتكرّر ، يعني فينا نقول هوّي متل الميّ اللي ما منقدر نقعد بلاها بس إذا شاكين بأمرا مش غلط تتكرّر ، وهيك منستفيد بالحاضر ونخطّط لمستقبل متين ومقرّر ، ولنعمل هيك لازم يكون عنّا عين عالماضي وعين عالمستقبل حتّى نخلّي عقلنا محرّر ، وإذا انصاب الماضي عنّا لازم المستقبل يداوي اللي تضرّر وما نخلّي الصفحات القديمة ترجّعنا بدل ما نتقدّم وما نسمح نعيد الأخطاء لو مين ما كان فينا غرّر
مايا إبراهيم
كاتبة لبنانية
