البريد
رأي

د. سحر محسوب تكتب: 50 سببا عن ليه الدكاترة تقعد في مصر؟!

Adv

♦ شاب مُجتهد .. عنده 18 سنة متفوّق في الثانوية العامة جاب مجموع كبير يؤهله إنه يحقق حلمه.  ويدخل كلية الطبّ ويعالج الفقراء.  دخل الكلية تعب جدًا فيها فجأه أصبح كبير ولازم يعلم نفسه.

الدكاترة معظم الوقت مش بتشرحله قد ما بتهزقه. عافر كتير وكافح عشان يحقق حلمه ما هو بعد الكلية هيرتاح خلص الكلية وهو 25 سنة ما هو في امتياز خلاص هيتعلم في امتياز.

 

وخلاص الدنيا ضحكتله يا عم والدكتور راح والدكتور جه لقى نفسه بردو لوحده قاعد سدّ خانه مكان السنيور بتاعه لأنه مش موجود طب مين اللي هيعلمني بقى!!

 

أقعد وخلاص بكره تتعلم تيجي حاله والتانيه قوم اشتغل انت هتفضل قاعدلي !!؟مانا مش عارف محدش علمني ؟!

 

اشتغل وانت هتتعلم .. آآآآآه أنا هتعلم كده !!

ومره تصيب ومره تخيب وأهي ماشيه ولما يلاقي عمليات وخلاص الدنيا هتضحك يبص يلاقي الجيش الجيش الجيش.

إيه .. لسه الجيش .. كنت نسيت .. يالا مش مشكله كلها سنه وربنا يكرم وهتخلص بسرعه وأخلص.

سنه إيه بس.. مش شوفتنى كتبهالك 3 مرات.. إيه.. 3 سنين !!!

يطلع من الجيش ناسى نفسه وناسى اسمه 3 سنين وأخيرًا خلصت الدنيا لازم هتضحكلي بقى أنا داخل على الـ 29 لو مضحكتش دلوقت هتضحك إمته !!!

يا حبيبى هتضحكلك وانت ممارس عام ؟؟ دي تيجي !!

مش لازم تتعلم الأول !! الكلية دي كانت مجرد بتؤهلك .. التعليم كله في الدراسات العُليا.

دخلت الماجستير عشان تتعلم وبعدين إيه دا مجرد أربع سنين (عالورق) وهتطلع متعلم ودكتور قد الدنيا الناس كلها بتتخانق عليك.

طب ياللا بينا..

قدم في الماجستير واتقبل ولقى اسمه ما شاء الله نازل في كل يوم عياده ياااااااه أخيرًا هتعلم هنزل كل ده والاقي حد يقف معايا ويعلمني الحمد لله إني خلاص فهمت الطريق متأخر بس مش مشكلة فأنا كل يوم هتعلم حاجه جديدة فعلاً مكنش ينفع أشتغل من غير ما اتعلم.

ينزل أول يوم يلاقي الممرضة في انتظاره إيه يا دكتور اتأخرت ليه كده !!!

ليه إيه يا مس دا هما 5 دقايق وانا داخل الناس زحمة جدًا بالعيادة عاملين زحمة مش عارف أدخل شكل الدكتور اللي هيدينا النهاردة واحنا معاه شاطر أوي حتى الناس جاياله أكتر وبعدين الدكتور يعني زمانه بدأ هو هيستنى واحد بس !! زمانه بدأ مع الزملاء

الممرضة بعوجه بوق زملاء مين يا دكتور ودكتور مين يا دكتور العيانين دول مستنينك انت حضرتك ماسك النهارده عيادة (أ) والناس دي كلها جايه تعمل جلساتها.

إيه إيه عيادة (أ) دي وجلسات إيه هو مش في دكتور معايا هيعلمني أشتغلها إزاي !!!

دكتور إيه بس يا دكتور الله يكرمك انت متأخر وعاوزين نروح بدري خش وانت هتتعلم لوحدك.

برده لوحدي ..

اُدخل واشتغل واتعلم ولو في حاجة معرفتهاش !!

يا دكتور بس بقي ارحمنا والـ 4 سنين بقوا 6 ومش لاقي حد يعلمه احضر لك كام محاضره على الكام حاله اللي شوفتهم وهتمشي ما هو مش معقوله بعد الشغل ده كله ولسه هتقعد ولا أنت مش محتاج تذاكر أصلا هتشوف ايه اكتر من اللي شوفته في الشغل بكل الحالات دي وانت اللي بتعالجها وزي الفل ادخل الإمتحان يا ابني عشان تخلص وتسافر بقى انت داخل على 35 سنة ولسه حتى معملتش قرش تتجوز بيه يدخل الإمتحان يلاقوهم بيسألوه على إيه syndrome إيه !! ودي هعرفها منين يا باشا

ايه يا ابني مش عارفها دي syndrome بتيجي 1 في كل 3 مليون حاجه كده نادرة جدًا نزلت في آخر تحديث مش عارف في كتاب إيه انت مبتحضرش المحاضرات !!!؟

لا معلش كنت بشتغل في العيادة في الحالات الطبيعية اللي بتصيب الناس كلها.

فمالقتش وقت للحضور ومذاكرة الحالات النادرة اللي مش هتجيلي أصلاً.

بقولك إيه انت لسه هترد ابقى ذاكرها الدور الجاي.

والدور الجاي يجيب اللي بعده ويجيب أخوه وقرب ما يتم الـ 40 الحمد لله خلص بمحصله صفر مبقاش في وقت خلاص العمر جري .. طيب أنا لازم ألحق أسافرلي سنة سنتين أعمل قرشين وأصرف عاللي اتجوزتها متأخر دي هوب فجأة معلش ماجستير إيه يا باشا اللي انت واخده ومن جامعة إيه؟ ومحدش بيسافر بسنك ده.

إيه بعد كل ده طيب في مصر هعمل إيه أجري أشتغل برايفت وشغل المستشفى الحكومي وأطلع من ده على ده عشان يا دوب تصرف ثمن اللقمة وهوب فجأة من كتر الشغل يقع من طوله وهو شايل شيفت 24 ساعة لأن بقاله يومين منامش وفي المستشفى البقاء لله.

دا كل دا لسه في عز شبابه مين هيصرف على عيلته معلش احنا عارفين اللي انتم فيه بس دول ألف جنيه معاش و 900 النقابة وحاولوا تمشوا أموركم الدكتور ملحقش يعمل حاجة.

العمر ضاع في التعليم اللي بيصرف عليه واللي بيعلمه لنفسه وضاع في ردّ حق كل واحد هو مش عارف حقه منين وضاع الجري والشباب عشان بس يحقق حلمه دكتور مصري بيساعد الغلابة.

وطلع هو الغلبان اللي محتاج المساعدة.

لو دورنا على أسباب كتير تخلي الدكتور يقعد في بلده يخدم الغلابة والمهنة السامية عشان هو دكتور وعشان يرد حق البلد عليه هتكون هي هي أسباب هجرته وتصديره للخارج لمكان يقدر قيمة الطبيب وآدميته.

وهنا هيكون سؤالنا العكس ليه الأطباء اللي قاعدين في مصر لسه قاعدين في مصر!

 

د. سحر محسوب محمد

طبيبة مصرية

 

 

مقالات ذات صلة

زر الذهاب إلى الأعلى